Text: Gerhard Meister
Ja u ha du glich mau dr Arsch glüpft u bi zum Bruefsberater, ja, u när hani so Teschts müesse usfüue, Chrützli hie, Chrützli da u är het gmeint, mou, es sig eigentlech ziemlech klar, vo de Ergäbnis här chömm für mi eigentlech nume Aschtronaut i Frag u öb mer das scho mau überleit heig, Aschtronaut z wärde u i ha gmeint, nei, bis jetz nid, aber wenn er mein, i chönn ja mau, u das Wäutau heig sicher o siner faszinierende Site, wemes vo nächer aluegi, u i chönn ja mau es paar Bewärbige usela, das gäb ja nid so viu ztüe u das hani när o gmacht u hami när o chönne gar vorschteue bir NASA u die hei gmeint, Aschtronaute chönne si immer bruuche u heimer sone Azug gäh, woni ha müesse alege mit Heum u Rucksack u es paar Schlüüch u heimi när uf dSchtartrampi gschickt, u när hets gheisse, i söu ischtige u Platz näh u das hani gmacht u bi drin ghocket i dere Ragete u eine het mer dChnöpf erklärt u weler dass i im Notfau müess drücke u när isch Türe zuegange u sie hei d Ragete abglah u i drin ungerwägs zum Mond u bi dert glandet u das Hüehnerschtägli zdürab u ha no dänkt, das me da jetz irgend sone Sätzli müessti säge über chlini u grossi Schritte oder so u has irgendwie nid zämmebracht u ha dänkt i Gottsname, me cha o ohni Gschnurr das Leiterli zdürab u si Fuess i Mondschtoub setze u e Schritt mache u no mau eine u no ziemlech witi Schritte si das gsi, wäg dr Schwärchraft oder, wos weniger het dervo ufem Mond u vo derthär äbe o die Gümp wome cha mache dert obe ja, u i ha no es paar gmacht vo dene Gümp u bi när so chli dagschtange u ha dr schwarz Himmu gseh u di blaui Chugele zmitts drin, dÄrde oder u ha dänkt, warum nid Aschtronaut, es git sicher Schlimmers?