Rohfassung brühend

Rosmarin
ine Soppe ghört Rosmarin
frösche Rosmarin
frösche Rosmarin esch holzig
wiene Chrestbaum
Hart esch Holz
Harz im Holz
verschliesst de Hals,
verchläbt de Buch;
verdeckt de Darm
esst mer ned

Müehsam jedes Blättli zopfe,
e huere Büez, e cheibe Chrampf

De Choch chont hei,
min Metbewohner,
Hoi Choch, hesch guet frogi? Besch früeh zrog? Nüt los ir Beiz?
schöttlet de Chopf,
Joel seit er
ond schöttlet de Chopf
im Stel sent d Arome
d Stel sent gsond
das gebäbele chasch der spare
du schaffsch ned met Plastik
du schaffsch met em Läbe
heb achtig devor.

Ou wenn eine Choch heisst
Läng mer ned drii
Chasch mi sitwärts
röckwärts
vo vore

Vorwörf bruchi ned
ech meines Guet
guet met Pflanze
guet met Mönsche
e guete Mönsch
Guet-Mönsch

Du chonsch met Achtig
Dröck mol uf Bräms
Geb mol s Gas mer

Essisch ke Gmües, nome Fleisch
Suufsch ke Wasser, nome Bier
Chaufsch ke Bio, nor M-Budget

Velech hani ke Bezog, do hesch rächt
Velech fühtls sechs ah wie Plastik, das cha si
Velech weissi ned wos wachst, ganz bestemmt

Aber weisch wem eschs glich?
Weisch wem?
Weischs?

Im Antibiotika-Tier
us Ungarn oder so
Im Chäfig ipfercht
Us rostigem Getter
Met Spaltbode beleid
ond honderte Tier
Gen im Fuetter ond Soja,
Tier- ond Feschmähl
Ke Bewegig möglech
Ke Uslouf e Stond
ke Fröid im Läbe
nor Chranket, Eländ, Tod

Er schötlet de Chopf
Joel seit er
ond schötlet de Chopf
hesch rächt seit er
ond schötlet de Chopf
schötlet ne
ond schötlet
ond schötlet
ond schötlet

Joel du weisch vell
Weisch wies sett laufe
Joel du wottsch vell
Wottsch es guet
Wottsch es besser
Wottsch desi guet
Wottsch desi besser
Desi bessere
Dech bessere
Alles bessere

ech weiss ned vell
seit er
ech wott ned vell
seit er

Aber so de Omgang Joel
esch ned nome Chopf
De Chopf bruchsch zom dänke

ech bruche d Händ
d Händ zom gspöhre
di fini struktur
d Hoor ufem Chrut
s chrebelet
de Fenger

Au wenns Chrut scho tod esch
läbe duets glich
Glich du hesch rächt
velech eschs em glich
ech weiss es ou ned
ech weiss es ned
ech weiss es ned
ech weiss es ned
ech weiss es ned
ech weiss es ned
ech weiss es ned
ech weiss es ned